Plantun de Prouvènço

Pèr coumpara dos planto d'encò nostre

Festuca acuminata & Aegilops cylindrica

Festuca acuminata

Poaceae Graminaceae

Nom en français : Fétuque bigarrée.

Descripcioun :
Aquesto petugo trachis sus li pendis séusous is adré de mountagno. Fai de mato de fueio duro emé lou bout blanc e pougnènt quouro ié passas la man dessubre. La paumo de flour, jauno o vióuleto, de 4 à 7 cm, caup d'espigueto de 8 à 11 mm caduno emé 4 à 9 flour qu'an de lemma de 5 à 7 mm emé uno arèsto courto (o ges). La coupo de fueio mostro un esclerenchime de countùni e pulèu espès (vèire lou dessin e la fotò). Lou deforo èi lisc alor que lou dedins s'atrobo rufe.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 20 à 50 cm
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Festuca
Famiho : Poaceae
Famiho classico : Graminaceae

Ordre : Poales

Coulour de la flour : Verdo
Petalo : ges
Ø (o loungour) enflourejado : 4 à 7 cm
Flourido : Printèms - Estiéu

Sòu : Si
Autour basso e auto : 800 à 2800 m
Aparado : Noun
Jun à avoust

Liò : Pelouso - Esboudèu
Estànci : Mountagnard à Subaupen
Couroulougi : Ouroufito-Aupenco
Ref. sc. : Festuca acuminata Gaudin, 1811

Blad-dóu-diable(-di-long)

Aegilops cylindrica

Poaceae Graminaceae

Nom en français : Égilope cylindrique.

Descripcioun :
Aquéu blad-dóu-diable vèn de Turquìo e se pòu trouba d'eici d'eila dins li champ e lis escoumbre. Aleva noste relarg d'auto Prouvènço èi pulèu rare. Se recounèis à sa longo espigo que fai uno meno de cilindre de 4 mm de diamètre. Lis arèsto di glumo e di lemma soun courteto à la baso e loungarudo au soumet de l'espigo. Coumpara amé Aegilops ventricosa que ié sèmblo, mai que lis espigueto soun pu redouno.

Usanço :
Li blad-dóu-diable soun proche dis àvi fèr de nòsti blad cultiva. Soun adounc bon à manja, mai sara un pau long pèr n'en acampa li grano. Èron acampa en Sicilo à passa tèms.